時間綫
| 時間 | 事件 |
|---|---|
| 2020年 | 申請人以 F-1 留學生身份來到美國 |
| 2021年8月 | 香港人DED生效，申請人同時開始受到DED保護 |
| 2023年上旬 | 同自由先生合作，準備政治庇護申請 |
| 2023年中旬 | 完成案情分析、證詞及證據整理，正式遞交 I-589 |
| 2024年 | I-589 遞交約半年後申請 C8 工卡 |
| 2025年 | 申請人結婚，將配偶加入庇護申請 |
| 2026年中旬 | 案情出現新發展，補交新證據 |
| 2026年6月 | 收到庇護面試通知，開始面試培訓 |
| 2026年7月 | 完成庇護面試 |
| 2026年10月 | 批准庇護，夫妻二人一同取得庇護，並開始申請AS6、AS7綠卡 |
案情梗概
呢篇係寫俾香港人睇嘅，所以今次我儘量成篇都用返廣東話寫。
今次想講嘅係2026年10月通過嘅其中一宗香港人美國政治庇護成功案例。申請人2020年來美，當時仲係 F-1留學生，後來2021年亦自然受到香港人 DED 政策保護（參考）。不過申請人並無一嚟到美國就申請庇護，係到2023年先同自由先生合作，遞交 I-589，之後就一路等落去。申請人於2025年結婚，將配偶加入庇護申請裏面。到2026年7月面試，2026年10月通過，兩公婆順利取得庇護。
或者各位可能都知道，我其實係做香港 case 起家嘅。無他，因為我本來係香港人。最初接觸得最多，自然都係香港庇護申請者。尤其2019年之後一兩年間風頭火勢，更加多不勝數。後來做開咗，中國大陸嘅 case 迅速增長，我工作上嘅重心先慢慢轉咗過去。不過講數量，我手上一直都仲有唔少香港 case，DED香港人通過嘅都已經有不少了，只是無暇寫案例分析。但有更多一路仲等緊未面試，亦有啲無法通過轉去移民法庭繼續惡鬥。有啲案件係最近確定合作嘅，連 I-589 都未交，而家仲準備緊申請文件。總之乜嘢階段都有啦。
所以香港呢條線，我其實一路都無停過。只係因為中國案件暴增，所以佔比例越來越少，呢樣就真嘅。
「真實政見」與「認定政見」
呢單案嘅主線係政治意見。大家可能已經知道，政治意見入面有兩個概念頗為重要：「真實政見」（actual political opinion） 同「認定政見」（imputed political opinion）。
香港人庇護案件，絕大部分都係政見案情。有時會有PSG，還有少量係宗教、國籍。呢個係真嘅，唔好以為香港案情就只得政見一條路，不過詳細如何就不在此處多講。
「真實政見」同「認定政見」嘅分別喺邊呢？
「真實政見」比較直接。你真心支持某種政治理念（譬如港獨、或者純粹民主選舉、公民自由等等），或者參加某個政治活動，反對某啲政府政策，自己亦公開講過做過，後來因為呢種政治立場而惹上麻煩，或者驚以後會因此受到報復，因為的而且確係你自己嘅政治意見，所以就順理成章屬於「真實政見」。呢個概念大家好易明。
「認定政見」就迂迴少少。你心裏面實際諗乜，未必係成件事最關鍵嘅部分。所謂「認定」嘅意思，就係即使你並無某種特定政見或者有任何政治行為，但人地認為你擁有的話，係都要砌你生豬肉，就一口咬定你擁有一種特定政見。
譬如其實你從來都無參與過任何政治活動，某日見到單新聞，手痕喺網上留咗幾句 comment，冷嘲熱諷一下港共。自己可能覺得純粹寸兩句，講完就算。偏偏人地唔係咁睇，將你嗰幾句說話、連埋你 follow 過乜水、like 過乜嘢，冚唪唥摷返出嚟，最後「認定」你係反政府、港獨、危害國家安全，總之就一堆莫須有嘅罪名。你當然覺得自己當初只不過係鳩噏，但問題係，你覺得自己係點唔重要，重要嘅係政府（=迫害者）覺得你係一個咩人，然後想搞鬼你。呢個就係 imputed political opinion 最抵死之處。
再簡單啲講。
「真實政見」=你真係黃。
「認定政見」=你乜顔色都無關係，話知你係藍血人都好，但政府都當你係黃，就係想搞鳩你。
當然，我真正做案時，唔係求其寫句「政府想打擊我所以我好撚驚」就得。仲有好多問題要搞清楚，譬如邊個如此認定你？有咩原因？有無根據？呢個認定同你驚會發生嘅傷害有乜關係？等等等等，全部每一樣都要逐樣逐樣砌出嚟。
辦案流程
申請人由2023年開始同我合作。都係遵從一向嘅 Action Plan 做嘢。其實佢有啲材料係幾好嘅，不過有材料還有材料，點樣用先係另一回事。有啲望落去好似有利嘅證據，最終我要再搵過來代替。有另外一啲材料，我睇過又覺得負面影響大過正面影響，更無必要交上去。最後總之做咗大約90日度，先將成份申請整理好，再網上提交。
遞交申請後半年左右申請C8工卡，之後一等就等咗幾年。期間有啲同案情有關嘅新材料，我都有一路睇住，覺得適合嘅就儲低先，再考慮點樣放返入佢個案度。
到2026年中咁啱有啲新發展，我認為是時候補料了，所以補咗一次。無耐2026年6月就收到面試通知，就馬上準備面試培訓。
2026年7月真正面試當日，其實無啲乜嘢驚濤駭浪。問嘅嘢大致都係我哋準備過嘅範圍。申請人亦認為自己面試表現不過不失，無想像中咁難搞。
之後就等出結果，都等咗兩個月，其實算快了。因為好多人面完試後，等一年半載是等閑事。所以幾個月有結果，真係唔算得係乜。最後順利通過庇護，而家準備緊申請綠卡。
香港人DED，2027年會唔會續期？
借住呢單案，我亦想講下另一樣嘢。今期香港人DED而家去到2027年2月5日就終止啦，最近自然好多人四圍問，今次DED仲會唔會續期？續幾耐？幾時會宣佈續定唔續？我都收到不少電郵問呢樣嘢。因為我主業係庇護，DED其實唔係好關我事，所以其實可能大家收到嘅風仲多過我。但係無論如何，對於DED會唔會續期呢個問題，我嘅諗法係，
我鬼知咁多咩。
我俾你見到侵王本人你當口當面問佢，佢都唔會話到你知。就算佢而家已經有所主意，按照過往慣例，都係臨到差唔多到期時先會宣佈結果。所以而家各種猜測，基本上只係得個估字。認真的話你就輸了。
不過如果你問我樂唔樂觀，我其實真係唔太。現行DED延長到2027年2月5日係既定事實，你就當無得再續落去好過啦。咁樣你打算自我放逐去第三國，定係諗住「返」香港呢？
肯定又會有人跳出嚟講乜嘢128D大棋之類，就算最後真係唔續期，照樣死雞撐飯蓋話係當局嘅滅共壯舉，乜嘢侵侵咁識玩之類。去到如斯境界，其實發生乜嘢你都可以幫佢兜。你醒到咁同你講乜都嘥氣。
講到底，偏激到呢個地步，其實同你最憎嗰班人只係一體兩面。口口聲聲話反共，思維方式就倒模一樣，只不過人地奶嘅同你奶嘅唔係同一個主子咁解。我一向其實好少論政，只係專注於庇護本身，亦無意同呢啲人爭論咁多，慳返啖氣好過。
DED香港人是否應該申請美國庇護？
首先總係有人話DED本身就係廢嘅，朝不保夕，根本無出路。美國政府真心假意，根本無心幫香港人，應該一早就「大赦難民」、「香港人直接派綠卡」之類。呢啲論調明顯係無知者無畏，嫌人哋俾得唔夠就等於無俾。而且現實係，總之只得DED嘅情況下，你點可以最大化呢幾年換返嚟嘅時間，為自己搵到下一條路，先至最實際。
照我睇，DED雖然無法直接令你攞到綠卡，但都唔係完全無用嘅。呢幾年DED亦確實幫咗好多香港人，有不少人喺呢段期間結婚、有人行O簽證、R簽證、各種EB、取得庇護、或者搵到其他身份出路，最終攞到綠卡。但同時，未成功轉換身份嘅，我相信絕對大有人在，而且仲係大部分。
所以我一直都係嗰句。如果本身有庇護案情，就可以認真諗諗。 其實好多人幾年前就已經著手，只係一路拖到今日乜都未做，或者其實本身乜都做唔到。時至今日，你唔肯定自己有無案情的話，可以email問問我。睇完有就有，無就無，或者有好多人係灰色地帶嘅，可以再衡量下點樣處理最好，起碼搞清楚自己手上究竟仲有幾多張牌先。
我唔係話DED無行架啦所以你好快啲申請庇護。絕無此意。但如果你本身的確有案情嘅話，我認為唔應該將呢個問題再繼續束之高閣，當睇唔到就算。
當然，申請咗庇護亦唔代表就可以從此高枕無憂，更加唔擔保最後成功。但道理好簡單，你本身有案情、有一條理論上可以行得通嘅路，擺喺度唔用，係你捉到鹿唔識脫角，最後要走人的話，都無得賴。
嚟咗美國咁多年，而家先申請庇護，仲得咩？
亦有不少人知道，申請庇護通常需要喺入境美國後嘅一年内提出。而好多人嚟到美國已經好幾年了，咁係咪代表無得申請庇護呢？非也。
因為庇護嘅「一年限制」亦有例外。例子我唔舉太多啦，自己睇：入境超過一年申請庇護。當然，唔係你話「我以前有F-1」或者「香港而家變咗好多」就當收工，後面仲有 reasonable period 等問題要處理。
上面提到呢單案件嘅申請人當時仲係 F-1學生，所以佢申請庇護時嘅身份如何、點解入境3年後先申請、前後發生過啲乜，全部都要一齊考慮，然後策略鋪排，放喺申請材料入眠。
你過咗一年，就睇一年期限點處理。原居地情況變咗，或者你自己嘅情況變咗，就睇 changed circumstances 和/或 extraordinary circumstances。亦要思考嗰啲變化有無實際意義。超過一年的確係一個需要認真處理嘅問題，但絕對唔係一個見到就自動收皮嘅問題。
同一道理，唔好因為香港而家都已經靜曬，就打定輸數，諗住無得申請庇護架啦。現實絕非如此。
「2023年拜登年代申請庇護，梗係易批啦！」
我都估到有人會咁講。係，呢單申請係2023年遞交，當時的確係拜登政府。不過真正面試同有決定已經係2026年。你2023交表，唔會成單案就永久封印喺2023年。
當然，我亦唔會講到邊個坐喺白宮入面完全無影響。總統換屆，移民政策會變，USCIS做法會變，執法方向會變，庇護制度本身都有好多陰啲陰啲嘅變化。呢幾年大家睇新聞都睇到眼花，我仲同你講完全無影響，咁無疑係呃你嘅。
但第一，實際變化係咪咁大，尤其是USCIS嘅「正向庇護」審批標準係咪變得好交關，我可以同你講，並無好多人想像中咁嚴重。而家基本上同以前其實都係差唔多。移民官（並非移民法官）審批庇護嘅標準，還是同一套框架。呢個係我多年實戰得返嚟嘅結論。
第二，你根本控制唔到自己幾時面試。你可以拜登年代交，特朗普年代先面試。你可以係特朗普第一任期（約2017-2020年）遞交，而家先面試。我唔係老吹，我手頭上仲有奧巴馬時期（2017年前）已經遞交庇護申請嘅案在手，到而家仍然未有面試。
所以好多人成日諗，邊個做總統對庇護有利，所以而家唔好申請住先啦，等20xx年換第二個先算啦。你咁諗其實無乜意思。你控制唔到幾時面試，更加控制唔到到時邊個做總統。呢單案2023年遞交，到2026年先至面試同通過，中間連政府都換埋啦。再者更加緊要嘅係，又唔係總統閣下本人親自拎住你份 I-589 逐頁嚟睇然後作決定，而只不過係坐喺你對面嘅一位打份牛工嘅移民官同佢老頂話事，所以大家咁鍾意揣摩聖意，好多時其實都係捉錯用神嘅。（參考此文）
點解佢咁快有面試？我等咗N年啦喎！
我都唔知點解。不過老實講，我又知道點解會出現呢種情況。
庇護面試排期從來都唔係一條直線，唔係先到先得，亦唔係後來先上。（參考此文）有人交咗幾個月就有面試，有人三五七年，有人等咗十年都未有。你以為已經石沉大海，無端端有一日收到 interview notice。你一定要我歸納出一套規律，我只能夠話，對我哋實際做案嘅人嚟講，好多時候就係無乜規律，係比較隨機嘅。
你唔鍾意接受呢個現實我都無符，但係移民局唔會因為你而家還有其他身份就遲啲先搵你，或者你覺得自己個案好強好犀利，所以就應該好快會有面試。現實中無你諗咁理想，唔係你想點就點。
所以已經申請咗庇護嘅朋友，必須時常留意住案件狀態。幾時排到面試，無人可以預先話你知。真係收到 interview notice，就好好準備。幾年前交上去嘅 I-589、statement、證據，全部重新審閲。自己呢幾年有乜變化、香港/中國有乜新情況、需唔需要補料，都需要好好思考後逐樣處理。
同我合作嘅，我其實亦會根據你嘅實際案情一路跟進。有任何適合嘅新證據，我都會再思考需唔需要加落去、點樣加、幾時加先最適合。呢個亦係我工作一部份。
我嘅庇護申請已經遞交咗幾年，而家先搵自由先生，仲有無用？
可能有用。點解唔係「一定」有用呢？因為我唔係乜案都會接。有啲案個頭開得太壞的話，我真係啃唔落，只可說愛莫能助，另請高明。
我亦唔會為咗接一單案，明知前面有個大氹，仲同你講唔緊要，我幫你一定搞得掂。搞唔掂就係搞唔掂，早啲講清楚對雙方都好。
不過如果分析過後，我認為問題仲有得處理的話，我通常都會願意睇睇。
其實我手上一直都有唔少中途先開始合作嘅個案。有人當年自己遞交，有人以前搵過其他人做，有人當初交嗰陣覺得自己份材料已經做得算係咁，擺咗幾年之後再攞出嚟睇，先發現原來有啲地方當年根本從來都無講清楚。亦有人份材料本身未必有咩大問題，只係當年整理得比較簡陋，總之咩狀況都有。呢類case，我第一件事通常都係將以前交過嘅嘢由頭到尾睇清楚一次，再作判斷。
但點都好，中途合作唔代表可以推倒重新嚟過。所以你唔好以為，我以前份 statement 寫得唔好，你幫我重新寫過份得唔得？個遊戲並唔係咁玩嘅。所以中途合作，我通常唔會一開始就急住要改啲乜嘢先。我會睇清楚邊啲地方真係有問題，問題有幾大，點解會出現，真相又是如何。邊啲只係寫得唔夠完整，還可以補充。邊啲係當年無證據，而家有機會補救返。邊啲事情係遞交 I-589 之後先發生，本來就應該作為新發展去處理。亦有啲地方其實完全無問題，咁就咪鬼郁佢啦。
補得到的話就補，解釋得到就解釋。補唔到嘅，亦唔好為咗冚一個窿，隔離再挖多三個窿去填氹，咁樣做係非常唔明智嘅。
無論如何，有一樣嘢我可以比較肯定，就係即使你個申請已經遞交咗幾年，亦唔代表案情一定已經定型，乜都做唔到。但同時，亦唔代表你今日先搵人執手尾，就可以將以前發生過嘅嘢一筆勾銷。中間有幾多空間可以走盞，真係要睇過你嘅材料先可以作出判斷。
香港人DED直接攞綠卡？美國國會新法案會否通過？
另外，大家應該都有留意到，最近參衆兩院議員亦提出咗一份 Hong Konger Promise of Refuge Act，打算俾符合條件嘅香港DED人士直接申請綠卡。（參議院法案；衆議院法案）。簡單講，呢份法案如果真係通過，部分一直靠DED留喺美國嘅香港人，就可能毋須再透過庇護或者其他移民途徑，直接申請永久居民身份，一步到位攞綠卡。聽落當然好吸引啦。不過大家先唔好開心得咁早住。提出法案，同真正成為法律，係兩回事。 美國國會以前亦提出過唔少保護香港人嘅移民法案，最後都係遺憾無疾而終。今次呢份法案目前亦只係剛剛提出，能否通過尚且係一個問題。況且今年國會任期已經所剩無幾，如果未能趕及通過，今屆國會就係咁先啦。（但絕非有啲人講咁會胎死腹中。因為今屆通過唔到，下屆係可以當新法案提出嘅。）
然後我都留意到有人話，以前國會都試過俾利比里亞人、海地人等特定國籍人士特別申請綠卡。2019年利比里亞人嗰份法案，仲成功夾咗入國防授權法案（NDAA）一齊通過添。無錯，歷史上確實有呢啲先例。但以前有人行得通，唔代表今次照辦煮碗就一定得。 NDAA又唔係你想塞乜入去就塞乜入去。國防授權法案主要係處理國防政策同軍事事務，雖然間中會夾雜一啲同國防無直接關係嘅條文，但唔代表任何議員求其提出一項移民政策，就可以搭順風車過骨。首先要有人肯推動，仲要得到足夠嘅跨黨派支持，兩院協商時又要保得住條文，現實中好多時呢啲無關痛癢嘅問題，係會變做政治籌碼被犧牲嘅。最終唔好唔記得，還要總統肯畫押先得。中間任何一關出咗問題，都隨時前功盡廢。所以大家諗到幾多絕橋、搵到幾多前例都好，始終都要有人願意為呢件事付出政治代價，先有機會成事。否則紙上談兵講到天花龍鳳，最後可能都係得個講字。
所以呢份法案，大家當然可以繼續留意，但暫時唔值得寄予厚望。我當然希望佢通過（因為事實上肯定會更多人與我合作申請綠卡），但千祈唔好將自己嘅身份安排全部押喺呢個法案上面。 萬一最後法案不了了之，就真係喊都無謂。
常見問題
係咪香港人就應該取得美國庇護？
唔係。最終係睇你嘅個人案情。「香港人」三個字並非絕招。有案情就有案情，無案情都唔會因為你係香港人從無變到有。
我從來無俾人拉過，警察又無搞過我，有無庇護案情可言？
有可能存在庇護案情。無被捕、無坐監、無被人打、無被人恐嚇過，主要代表你未必有「迫害」。但庇護亦可以建基於將來嘅「合理恐懼」。 譬如你以前參與過政治活動，網上留言，或者離港之後繼續活動，而同你背景相近嘅人近年已經有人被捕、檢控、定罪，呢啲都可以作為輔助證據，證明你有一個「合理恐懼」，從而支持你嘅庇護申請。
我2019年其實無做過乜，係嚟美國之後先開始變得活躍，咁又可唔可以申請庇護？
可能可以，但都唔係一定嘅。你來到美國後先開始變得更活躍嘅，第一係屬於所謂 sur place 理論嘅其中一種情況，即係你離開原居地之後，因為自己後來嘅活動而產生咗新嘅迫害風險，可以支持庇護申請。第二，又可以同「一年期限」嘅 changed circumstances 掛鈎。但實戰裏面，你幾時開始呢啲活動或言論、點解開始、做咗幾耐、實際做過乜、公開程度有幾高、政府有幾大可能知道，都要逐樣睇，先可以判斷到實際案情力度如何。
我都已經有DED，點解仲要申請庇護？
都到咗呢個地步啦，仲問呢個問題嚟做乜。如果DED不幸無得續期，你又無其他後路，就只能一係去第二度，一係返去你親愛嘅香港，一係就揾方法喺美國留低。無人話你一定要申請庇護。申請庇護只係衆多方法中嘅其中一個，並非唯一。
我只係網上鬧過吓港共，無親身落過場，咁都算？
有機會。尤其睇返今日香港嘅政治環境，網上活動同親身落場，其實並無本質上嘅高低優劣之分。我要睇嘅係你究竟講過乜，偶然抽兩句水定係多年持續發表，用真名定假名，account 點樣同你本人連得上，有幾公開，有無被人轉載、起底、舉報之類，甚至有無其他事情令政府更加容易認得出你。你五年前用「肥仔689」ID喺連登留言一句DLLM，同一個實名account幾年來持續發表有内涵有主題嘅文字，兩者當然不能相提並論。
屋企人同好多朋友仲喺香港，個個都無事，會唔會證明我返去都無事？
未必。首先要問你屋企人或者朋友同你係咪有相同政治背景。如果政治活動只係你自己做、網上account係你嘅、政府可能認定嘅人亦係你，你阿媽而家每日照樣落街飲茶，本身證明唔到啲乜。但如果你單案講到全家一早已經被當局針對，而你父母兄弟姊妹幾年來出入自由、乜事都無，咁美國移民局問起你究竟怕乜春亦完全合理。呢啲唔係一句「屋企人安全所以我安全」或者「屋企人同我無關」就可以打發，要睇你自己嘅個人風險究竟從何而來，我先可以判斷到。
我申請庇護之後，仲可唔可以返香港？
你仲有呢個問題的話，我建議你最好唔好申請美國庇護。（參考此文）
總結
其實我想講嘅都差唔多講完。呢單案最後有個好結果，我當然戥申請人高興。由2023年開始準備，到2026年真正批准庇護，三年其實已經係好快了，有申請庇護嘅人都知。做得庇護越耐，越覺得世事無常。政策點變無人知，香港幾年後會變成點無人知，DED有無得繼續落去我亦都唔知，綠卡法案會否通過我更加唔知。所以大家可以做嘅事情其實好有限，就係趁仲有時間，將自己嘅情況搞清楚，有問題就儘快處理，仲有第二條路可以行嘅話，就認真研究下係咪需要開始。幾年之後回首一望，希望今日做過嘅決定，至少無令自己後悔當初點解乜都無做過，都算係咁啦。
係咁先啦，無論如何，希望各位繼續一切順利。