唔駛咁快革扯！【又多兩年！】突發公佈：美國香港人DED政策延長24個月至2027年
最近成日都聽到香港人討論2025年2月5日DED到期嘅事。大家都驚到騰騰震，日日都擔心到瞓唔著。有啲人成日旨意特朗普會救香港人所以一定會續，但亦都有唔少人話，好快啲自己諗計搵定後路。講真，我唔知會點，不過我諗到8個可能結果。而家逐個講下：
拜登續DED，特朗普唔郁佢
第一個可能：如果拜登臨走前幫香港人續咗DED，特朗普上台之後好大機會都唔會郁佢。我哋要知道，DED係總統權力，特朗普要推翻其實好易，佢一個人話事就得。但係佢以前做總統時，通常都係揀啲大件嘢，有新聞價值嘅嚟搞。所以如果拜登續咗DED的話，特朗普未必會特登嘥時間去搞呢啲細囈嘢（住）。
拜登續兩年，特朗普當冇睇到
第二個可能：拜登續兩年，特朗普上台後當睇唔到。佢會等住DED自己慢慢死，等香港人自己知難而退，好行夾唔送。呢個機會都幾大，因為反正香港人又唔係佢嘅票源，又唔係佢嘅金主，佢睬你都有味。
拜登續咗，特朗普一上台即斬纜
第三個可能：拜登續咗，特朗普一上台就即刻斬纜。呢個可能性都唔低，因為特朗普最憎就係拜登嘅嘢（或者唔係佢自己開始嘅嘢）。佢上台第一件事就係要 shake things up，盡可能剷走曬拜登所有政策，等大家知佢幾咁L威。加上佢成日話要收緊移民，話知你係合法定唔合法，香港人DED咁啱時辰到，好快啲過主啦。
拜登唔續，反而特朗普幫香港人續DED
第四個可能：拜登唔續，但特朗普會幫香港人續DED。呵呵，咁就出奇咯。好多人話喺美國住嘅香港人又少，又「乖」，又有少少錢，2019年仲咁多人多謝侵侵舉星條旗遊行，佢點都會通融下掛。有無呢種可能？當然有。但概率有幾高，我唔敢估啦。如果拜登臨走前真係唔騷香港人，而特朗普又肯捱義氣續期DED的話，咁就真係皆大歡喜。我都想大家可以繼續留喺美國。
拜登唔續，特朗普更加唔睬你
第五個可能：拜登唔續，特朗普更加唔9理你。唔好我以為盲撐拜登，或者逢侵必反。拜登講真喺移民政策上都唔係咩善類，佢2023年對於庇護都施加咗不少限制，理論上都係一個契弟嚟嘅。所以如果特朗普嚟一個順水推舟，就係唔續DED的話，到時不少香港人真係要執包袱，認命搵第二條路。呢個機會講真都唔細。
有人上訴，打官司拖延
第六個可能：有人告上法庭。如果DED冇得續或者被迫終止，可能會有人或者民權組織去告。但係法院一向都好尊重總統喺移民政策上面嘅決定權。所以就算打官司都未必打得贏，最多都係拖多幾個月吊命。
國會插手立法保護香港人
第七個可能：國會插手。雖然DED係總統權力，但係國會都可以出招。國會隨時可以整個法案出嚟保護香港人，到時就算總統點搞都冇用。但係睇現實，新一屆國會唔似會喺移民政策上會有利好消息，佢唔搞你已經拜得神落。所以睇怕為香港人搞咩法案嘅機會實在太低。
新方案替代DED
第八個可能：DED完之前，國土安全部傾掂數，搞個新方案出嚟。例如改做TPS，或者好似國會2019年嗰陣俾利比里亞人整個特別計劃，所以 wind down （慢慢結束）DED，或者甚至乾脆開個綠卡門俾你嘆。嘩咁就發達咯。但咁咁大隻蛤乸，well…… 俾你捉到就偷笑。
總結
講真，睇晒呢八個可能，我都唔知有咩好講。
你可能會諗，Diu你，長篇大論，即係聽君一席話如聽一席話啫，咪即係乜都有可能，嘥L曬我啲時間。
係，今舖我真係唔知點估，所以只能講曬我諗到嘅所有可能結果出嚟，然後等大家自己判斷。
因此如果你而家仲只係DED的話，而且仲係無其他身份或庇護申請，就請你唔好淨係諗住等政府會打救你，或者點打救你，幾時會打救你，亦都唔好等到嗰日殺到埋身先諗點算。趁依家仲有時間，快啲做好準備。呢個世界最穩陣嘅，唔係政府，唔係我，而係你自己。