呢篇文章主要寫俾香港人睇，所以我用返廣東話。
係人都知，美國對於香港人嘅DED政策將會喺2023年2月5號屆滿。到期之後會點算？呢條問題好多人問我，坦白講我真係唔知。我無去過白宮，又無見過拜登、更加唔識啲咩線人，所以完全無消息喺手。
我研究觀察咗美國人道主義移民政策咁耐，唔多唔少都會有啲諗法。而建基於呢啲諗法，我想做個大膽假設，推測香港人DED政策2023年嘅走向。
TL;DR懶人版：DED政策可以續命18個月。工卡都可以繼續延長。但唔會有更多優惠措施。即係話，如果你想DED會升級做TPS，甚至跳級變成綠卡的話，就真係可以早啲抖。
先旨聲明：以下內容純粹為個人推測。實情會係點，只能等待白宮正式宣佈。（2023年1月26日消息：宣佈了！）
大膽預測①：DED會喺2023年1月宣佈延續多18個月（結果：唔中。因為延長24個月）
其實呢個預測一啲都唔大膽。因為DED續期係一件好平常嘅事。利比里亞都已經唔知續咗幾多年，一直都有DED罩住。所以如果香港有得續期的話，都絕對唔出奇。
再者出於現實角度睇，如果香港人DED喺2023年2月5號後唔會繼續，會可能造成更大嘅噪音，令美國朝野甚至國際社會覺得美國唔夠牙力。所以DED續期係一個最理性嘅選擇。只要乜都唔變，就唔會有人咦依哦哦阿吱阿咗。
至於點解要拖到2023年1月先會宣佈延續？我都係嗰句，純粹假設，甚至有可能拖到2023年2月先宣佈添。睇返往績，白宮好鐘意臨到最後一刻，到期前幾個星期甚至幾日先至公告天下DED會唔會續期。所以我覺得，今次白宮都係會死扭到過埋個龍先射門架啦。
咁點解只係續期18個月？原因都好簡單：因為過往DED續期，通常都係18個月18個月咁續，有時亦都會一續就續24個月嘅。但最近幾次其他國家續期，都係18個月，所以無乜特別理由的話，駛乜特登搞啲新規矩出嚟，一樣方法處理最實際。再續18個月後，跟住仲會唔會再續落去？暫時言之尚早。我估都估唔到咁多啦。
大膽預測②：2021年8月5日生效期唔會推遲（結果：唔中。因為生效日會推遲到2023年1月26日，仲好！）
咩意思？而家對於香港人生效嘅DED，係以2021年8月5日為界限。必須係呢日前已經身在美國嘅香港人，先會有資格受DED保護。喺呢日後先嚟到美國嘅朋友，唔好意思，就唔受DED保障。你話有無可能續期嗰陣，會將生效期推遲，包括埋2021年8月5日後先嚟到美國嘅香港人？我估計唔會。
香港人DED避風港救生艇工卡（EAD）陸續收到
由於DED將於2023年2月5日到期，亦無人知曉DED會否延續下去，再者，DED並無通向取得綠卡的道路，所以其實有更多香港人爭取在這段時間，已經開始和自由先生合作，申請政治庇護。免受DED政策的搖擺影響。
繼續閱讀
大膽預測③：DED唔會升級做TPS或者綠卡（結果：中）
其實DED會唔會變成TPS，真係比較難講。因為以前的而且確係有國家會從DED升級做TPS嘅，例如委內瑞拉、海地、薩爾瓦多，等等。但亦有不少國家係DED完咗就玩完，無得升級，譬如波蘭、捷克、智利，等等。所以香港2023年會升呢、GG、定原封不動？我目前估計係原封不動。不過，即使有機會變成TPS都好，TPS係無直接途徑變成綠卡嘅，所以變唔變TPS都好，都係嘥氣。
至於DED有無可能變做綠卡？咁就真係中頭獎啦。所以我估計更加唔可能發生。據我所知，以往只有一個國家獲得呢個待遇，真係飛機撞紙鳶，咁啱得咁橋，正正就係中國。
因為1989年六四事件，所以喺1990年嘅12711號行政命令，總統授予當時身在美國領土嘅中國人Extended Voluntary Departure（EVD；即DED前身），令到當時喺美國有大概8萬個中國人可以唔駛離開，繼續合法留喺美國。然後1992年10月9日，總統簽署由參眾兩院通過嘅CSPA，即《中國學生保護法案》，令12711號行政命令成為永久條款，可以令中國人循呢個途徑攞到美國綠卡。呢個就係眾所周知嘅「六四血卡」。
顧名思義，六四血卡係用其他人嘅血而換返嚟嘅綠卡。我呢度唔打算從道德角度探討呢個問題，單純從政策層面上嚟睇，香港而家嘅情況同1990年代嘅中國可唔可以相提並論先？大家心中有數。所以我嘅推測係：如果香港唔發生咩大事（大吉利是，我都唔想），DED香港人無可能有途徑會變成綠卡。
再者，任何呢啲特殊途徑都需要法案支持。目前我見唔到國會有議員對呢件事有興趣，連法案都無，又點樣會成為現實。
大膽預測④：DED延續對庇護申請者有利（結果：一定中）
DED同庇護（asylum）係兩回事。單純嘅DED並無機會變成綠卡（你DED然後同公民結婚取得綠卡，呢啲唔算DED途徑取得綠卡，而係公民配偶身份綠卡）；但庇護係有途徑取得綠卡嘅。
咁既然DED同庇護係兩條唔會交叉嘅路，DED延續落去對尋求庇護者有乜好處？
如果你尋求庇護，面試通過，取得庇護身份，你就已經一隻腳上咗岸，咁樣DED係咪延續落去，的確對你無乜影響。
但如果你唔好彩，過唔到庇護面試，無其他身份，按程序就係上移民法庭辯護。如果移民法庭都過唔到的話，法官就落遞解令，叫你走人。但如果你上移民法庭時有DED保住，情況就唔同。
你無違反DED裏面嘅條款的話，你就算庇護面試輸咗，亦有DED照住，直頭可以同移民法庭申請 motion to dismiss，撤銷控訴。咁的話即係打回原形，從新嚟過。
呢種情況自從DED喺2021年生效以嚟，已經發生過好多次，可以令來自香港嘅庇護申請人喺程序上獲得更多保障。所以即使DED喺表面上對於申請庇護無乜幫助，但實際上形成咗一層保護網嘅作用，起碼唔使即刻革扯先。
總結
依目前狀況嚟睇，香港人DED再續期18個月並唔難，但係DED咁續落去，都唔係長遠之計。所以大家就算而家靠住DED，都唔好諗住可以食一世。咁點算好啊大佬？
我上年已經就住呢個問題寫咗篇文章，得閒就睇下：只剩下一年時間！DED香港人怎樣可以留在美國？
我呢四個預測裏面，有幾多個會中？四個全中？定四大皆空？請大家拭目而待。
【文字版】只剩下一年時間！DED香港人怎樣可以留在美國？（就算DED續期都要諗定後路…）
救生艇本來就是臨時性質，當船隻沉沒中的時候，避難者蜂擁登上救生艇逃命，終歸都要找個碼頭泊岸，不可能一輩子就在怒海裡漂浮。……及早打算，儘快預備，爭取在這一年內確定自己在美國的合法身份。
Keep reading
