救生艇？避風港？揀錯計劃，可能會無綠卡？

【突發公佈】美國香港人DED政策延長24個月至2025年

本次延長會包括2021年8月5日至2023年1月26日抵達美國的香港人。

Keep reading

by 自由先生 Andrew Q 2023-01-262023-05-04

請先參考：【突發】香港人TPS・難民避風港救生艇條款 [暫時…]全軍覆沒

香港同海外嘅媒體，呢一兩年都成日講，呢個國家又通過「救生艇計劃」、嗰個國家又推出「避風港政策」。好多朋友都問我，究竟呢啲救生艇、避風港實情包括啲乜？而申請咗救生艇、避風港之後，幾時可以攞到綠卡？

無論「救生艇」又好，「避風港」又好，都只係大家日常生活溝通中追求方便嘅俗語，並非實際應用上嘅專有詞彙。而所謂「救生艇」、「避風港」，其實好多時都係講緊4個截然不同嘅政策。只不過大家都籠統用呢啲貼地稱呼，去代表一啲針對香港人嘅移民特惠措施，以及人道援助政策。今日自由先生就同大家簡單解釋一下呢四個不同身份嘅分別，睇下邊樣啱自己，唔好再搞錯啦！

DED (Deferred Enforced Departure)

亦即暫緩強制離境。按照目前嘅DED政策，你需要在2021年8月5日前已經身在美國，先可以獲得DED計劃嘅保護。但係，呢個計劃並無任何直接導向取得綠卡嘅途徑。亦即係話，就算你受DED保護，如果你喺DED期限內轉換唔到其他移民身份，只要DED一夠期，都係要講拜拜。

參考：https://mrfreedomusa.com/glossary/#ded

成功率：100%。只要係2021年8月5日身在美國嘅合資格香港人，係自動獲得DED嘅。除非你係DED政策裏面講嘅一啲少數嘅不合資格人士，否則DED係直接派俾你，你無得唔要。係如果你要申請DED類別嘅工卡（EAD）合法工作的話，先要特別申請。之後如果DED又再延續的話，其時亦會有一個新的條件，容許某個日子前已經身處美國嘅人取得DED資格。但因為DED本身並無轉變成為綠卡嘅途徑，所以只係一個過渡措施。

P.S. 不少人問我：美國會唔會好似因為1989年六四事件時大赦中國人，將來又會「大赦」香港人，向所有在美國嘅香港人無條件發放綠卡？我暫時睇唔到有咁嘅可能。原因好簡單：要大赦通常都要國會兩院通過特別法案，先可以令所謂「大赦」生效。而家無任何一位美國國會議員提出呢個諗法，所以大家唔需要對於大赦有太多不必要嘅幻想，以為可以坐住喺度䟴䟴腳，綠卡就垂手可得。

TPS (Temporary Protected Status)

臨時保護身份。目前仍未對香港人實施。呢個就係最近2022年2月通過嘅《美國競爭法案》嘅其中一環。一旦美國參議院通過相關法案，通常會馬上執行。所以如果希望獲得TPS資格，一定要在法案通過前，已經身在美國。但此計劃同DED一樣，沒有取得綠卡嘅途徑。如要取得綠卡，最通常嘅做法係，獲得TPS嘅人士會喺居留美國期間【1】與公民/綠卡持有人結婚，【2】有僱主贊助工作身份，或【3】申請政治庇護。否則，就算TPS計劃為期幾耐都好，都無機會攞到綠卡。如果TPS政策暫停，你又未搵到路數轉換身份，又係同DED一樣，sayonara 啦。

參考：https://mrfreedomusa.com/glossary/#tps

成功率：未知。但我處理過其他國家嘅國民TPS申請。通常只要交齊申請文件，就唔會遭到拒絕。所以成功率應該都幾高。但係同DED一樣，TPS無轉變成綠卡嘅途徑，所以只係權宜之計。好多TPS申請者都會同時申請埋政治庇護。因為TPS都係臨時性質，隨時會被取消。而政治庇護先有一個明確嘅路線圖，如果通過的話，可以話俾你知幾時會獲得綠卡，幾時可以入籍。

難民 (Refugee)

要成為「難民」的話，只能在美國境外申請。通常第一步就係向聯合國難民署（UNHCR）遞交申請，或者如果你已經離開咗香港，向所在國處理難民事務嘅部門申請。申請難民一般不可以選擇目的國。換言之，如果你只想來到美國的話，申請成為難民，並不一定會達到你嘅目的。但如果你去任何國家都得，咁難民係可行嘅。不過無論如何，都要先經過程序審批。以我目前所知，香港人未有人成為過難民。喺美國嘅移民法裏面，「難民」同「政治庇護」係兩回事，只不過好多媒體貪方便混為一談。

參考：https://mrfreedomusa.com/glossary/#refugee

成功率：未知。因為好多香港人未需要去到申請難民。而且等待難民批准期間，亦不能來到美國，自由度好細。對於想儘快離開香港嘅朋友嚟講，唔係十分理想。

政治庇護 (Asylum)

呢個係目前最多香港人使用嘅途徑。要申請政治庇護，第一步要先到達美國。無論以旅遊簽證入境好，定係學生簽證入境好，都無問題。只要入境後，提交政治庇護申請，通過政治庇護面試，就可以獲得政治庇護身份，成為Asylee。成為Asylee的一年後，就可以申請成為美國永久居民，然後取得綠卡。

參考：https://mrfreedomusa.com/glossary/#asylum

成功率：案情越強，越容易成功。申請政治庇護，我本身揀客做。案情太弱嘅，我通常勸佢地唔好浪費時間，不如疊埋心水諗其他方法好過。政治庇護唔係人人都有條件通過到。甚至即使有條件都好，唔係人人都可以組織得好，俾移民局知道你點解應該獲得政治庇護資格。但係如果準備得好嘅話，政治庇護嘅前途係最確定嘅。所以我接得嘅個案，都係精心準備，可以順利面試通過。我唔係話我特別犀利，只不過係申請者本身嘅案情夠強，資料充足，面試準備做得好，加上申請者同我大家密切合作，所以先可以通過庇護面試。

無論係叫救生艇，定係叫避風港，大家都要睇清計劃內容，究竟係講緊呢4樣嘢嘅邊一樣：DED、TPS、難民、政治庇護。呢幾個概念，好多人都成日混淆，但其實不同計劃會附帶完全不同嘅利益。如果大家對於呢幾個措施有任何疑問，可以隨時問我。